Mission riantuannak

Norway Chin Mission Church (NCMC)
Evangelism &Missionary
( E&M )

A kong                  : : Ramthar (Mission) Rianṭuannak
A min                    : : NCMC -Mission
Hmuitinh               : : Duhdim Nun, An Ngeih Khawhnak Hnga. John 10.10.  A lamkip i Ṭhanchonak
Baibal Cangthim  : :Khrih an zumh i Zultuṭha Si ter.Mathai 28:19.
Programe ngeitu  : :Norway Chin Mission Church (NCMC)
Ṭuanvo latu          : :Evangelism & Missionary (E&M) NCMC
Ṭuannak hmun    : :Mindat towns Baptist Association (MTBA) Pingring khua le Thilyn khua.
Ṭuanpi hawi        : :Rev.Bawi Lian Thawng. E&M Director Chin Baptist Association (CBA)
Kalaymyo.

E&M rianṭuan hramthok kum.
Norway ram Oslo le a kiangkap i a phanmi Laimi hna cu kan phaknak caan le kan umnak khua a dang liangluang na in (Oslo Chin Family) ti in hmunkhat te ah pumh tinak kan ngei. Kum le can a thleng lengmang i minung 100, hrawng kan hong phan cang. Cu tikah Kum 2007.01.11,thok in Norway Chin Mission Church (NCMC)tiah GM kaimi 99% lungtling in dirh hram kan thok. NCMC tiah Buu kan dir hramthok tein kan miphun Chinram,thlanglei kan unau zum lotu vialte hna le CCOC lio i Khrihfa ah a lut cangmi hna Khrih Zumhnakin a let a(kir)thanmi,thlang lei um kan unau hna sinah Khamhnak thawngthabia chim ding le a lamkip in ṭhancho ter dingah zapi lungtling tein Mission rian cu ṭuan ve dingah saduhthahnak lianpi he Thlacamnak kan ngei.

Kum 2008. in E & M committee upa ah thimmi hna.

1. Pu Tuan Hmung. E&M Director.
2. Pu. Mang Za Thang.
3. Pi. Ester Nu E.
4. Church Pastor.
5. Pu. Thang Hlun.Chairman a ṭuanmi paohpaoh telh zungzal ding.

Ramleng thok hlan ah Khrihfabu chung cawlcanghnak

Timhlamhnak ngeih a herh caah caantlawmpal chung cu kan mah Church chung lawngah E&M riantuannak cu thok si rih seh law,Innkip ah Ramthar riantuannak ding phaisa sanhnak Bawm (kuang)hun si seh tiah lungtlin a si i thla 4,ah voikhat E&M committee hna nih kholh siseh tiah bia kan rak chah. Thlali a tlin paoh ah E&M committee hna nih innkhat hnu inn khat rak vah le thlacam pumhnak te rak ngeihpi hnu ah Ramthar phaisa bawmte cu rak hon le rak rel a si. Pathian thawngin Khrihfabu dihlak lungthinchung ah thing le lung a biami hna siaherh zawnruahnak a um i zeimawzat phaisa cu kan rak hmuh khawh. Khrihfabu chungkhar kip cio zong nih thazaangthar kan rak la ngaingai hna. Pathian min thangthat si ko seh. Khrihfabu chungkhar le pumpaak cio zong nih Ramthar riantuan hi zeidah a si timi kan fian dih khawhnak hnga le Zum lotu hna caah pumpek in Khrih nih a kan fialmi rian sunglawi a si, cu caah mi dang cung i dawtnak le zawnruahnak lungthin kan ngeihmi cu kan ngeihchiah chawva tal lamkaltu ah fial ko ning timi lungput hi ngakchiak bikin upa bik tiang nih kan ngeih dih a herh caah tiin kum 2008,dih tiang ram chungah rian cu kan ttuan.

Pehtlaih Dingmi Kawlnak.
Kum 2009 GM biachahnak in Lairam lei ah tuan hramthok si cang seh law,a hodah kan pehtlaih lai, khawhzeika ah dah hmunhma kan hmuh khawh lai, timi dothlat dingah E&M upa hna cu rian khinh a si. ZBC-TABC hna le Church Pastor te cheukhat hna cu Ramthar riantuannak ding hmunhma le,a tuantu ding kawlhawl dingah kan chawnh biak hna. Kumkhat a dih tiang ah a hohmanh nih minung an kan hmuh piak khawh lo caah lungrethei ngai in kan rak um. Sihmanh seh law biatak chinchin in thla kan cam. Pathian nih kan ca hrang ah a tthabik in khua a khan ko lai timi zumhnak he kan rian cu kan peh zulh ciah mah. Minung kawlhawl ah hin a hohmanh i rinh lo in chimhchawnh duahmah i zuam hna u sih law minung an hmuh hnu ah pehtlaih dingmi cu kan thim te hna lai ti-in minung kawlhawl cu kan peh zulh lengmang.

Hakha in Wialliam Khen Chum Bik a rak phan.

Mission committee hna cu lungrethei ngai i kan um lio ah Hakha CCC cachim Wialliam Khen Chum Bik cu 2009,ah Norway ram khualipi Oslo ah MF , cawng dingin a rak phan i lunglawmhnak in kan khat. Kan phunghram ning bantuk in Pastor le Chairman a ttuanmi paoh cu E&M chungtel an si lai,ti a si bantuk in NCMC nih Pastor kan ttuan piak ko sawh tiah voihnih tiang kan soinawl hnu ah a kan cohlan i NCMC-E&M riantuantu hna cu kan lunglawmhnak kan chim cawk lo,chungtel zapi zong lunglawmhnak i kan khah pin ah kan hna zong a ngamtuk hringhran. Ramthar lei thlah dingmi kan hmuh hlan ah kan tuanmi rian hna cu a tanglei ah kan van langhter.

1. CCC Hakha ah Bible Sianginn minung pakhat kaiter ding le UTC (Matupi)ah minung pakhat, (Minung pahnih)kan kai ter hna.
2. Pu.Cung Hu,riantuanmi Thihlutnak kan bawmh.
3. Gangaw peng (GBA) ah Laica rel dingmi Muko uk 80. Senri Uk 20. kan hlut hna.
4. Asho Chin ngaktah zohkhenhmi hna bawmhnak.
5.Lairam ah harsat khunnak zualraal thil Inn kaang Meitek,Tilian meisul,a tongmi hna bawmhchanh ti-in rian cu kan pehzulh lengmang.
6.Sizung a phan i lungdong i a ummi hna thawngtheihmi hna bawmh.
7.

Kum 2010 -2012 tiang Riantuantu Thimnak.
Khrihfabu riantuantu hna cu kumhnih ah voikhat in thimnak um seh ti a si caah E&M upa hna zong thimnak caan kan phan i thlennawn kan hong si ve.
2010-2012 tiang E&M upa hna cu.
1. Pu. Tuan Hmung. Director.
2. Pu. Mang Za Thang.
3. Pu. Siang Pum.
4. Pu.Thang Hlun. Church Chairman tuan liomi.
5. William Khen Chum Bik.Pastor hna cu kumthum cung tuan dingin thim kan si hna.

Kum 2010 chungah kan tonmi thil hna.
Ramchung riantuannak le bawmh herhmi tete bawmhnak rian cu lungtho thanuam tein kan pehzulh lengmang lio ah ngeihchiah chawve le pumpek i riantuantu, khrihfaupa riantuannak zongah Biatak a dirpi pengmi, zohchun awktlak taktak a simi E&M upa Pu. Mang Za Thang nih 15.12.2010, ni le thla ah Cancer zawtnak, in a rian a tuanmi a pa sin ah a kan dinh taak. A kal taakmi a riantuan hawi hna le Khrihfabu vialte nih a zuun kan tuar hringhran. Kan tuanmi rian a ngeitu Pathian sin ah kan ton te lai timi ruahchannak he kan lung kan i hnem. Kum 2010, dongh ah Pu.Siang Pum,Khrihfaupa ah Vice Chairman le E&M rian a tuan cuahmahmi zong nih kan umnak khua a hlaat deuh caah kan mah dang tein Aurskog khuami cu kan i pum cang lai tiah a kan chuah taak ve. Hi kum cu Khrihfabu vialte zong nih an zuun kan tuar dih hna. Cu ti cun kum 2010 chung cu thih tian he nun tian he kan ton kum a si caah NCMC a hmunh chung ah cun philh khawh lomi kum le caan,tuanbia ah an cang lan. Hi bantuk i thil kan ton tikah Pu.Tuan Hmung, pakhat lawng E&M committee 3, thimmi chungin a taan cang tikah NCMC phunglamhrampi zulh in, kum 2011 a voikhatnak NCMC EC meetingah E&M upa a baumi hna zaka cu thim an si. Tleicia Pu.Mang Za Thang, nupi Pi. Zing Hnem Sung le Khrihfabu a kan chuahtaakmi Pu.Siang Pum nupi Pi.Ester Nu E, cu kan thim hna.

Kum 2011 March 9.
Kum 2011 mar 9,cu kan caah thawngtha kum a hong si cang. Rev.Bawi Lian Thawng nih Mission riantuan a duhmi ka hmuh cang hna, hmunhma zong Pathian thawngin kan hmuh cang, cu caah April thla cun kan riantuan hram kan thok khawh cang lai tiah thawng a kan thanh caah lunglawmh nak in kan khat i Pathian min kan thangthat. Mindat Township Baptist Association (MTBA) ram chung (a)Zion Area Pingring khua zumtu pakhathmanh um lonak hmun kan hmuh ca ko ah hin kan i lunghmui khun.(b)Thilyn khua Baptist Khrihfabu hna cu zohkhenhtu ngei lo in an um i zumtu cia a simi hna zong Budisht nih an soilem hna caah an kal lengmang i rak kan zohkhenh piak ko sawh u, khrihfa zumhnak in an i leet dih sual lai ti kan phaangtuk tiah thawng an kan thanh. Ramthar riantuan nak hmun kan hmuh cang timi thawng kan theih tikah Khrihfabu dihlak kan lung a lawm dih hna i Pathian sinah lawmhnak bia kan chim. Zeica tiah Zumtu hna cu tlaang tibual bantuk kan si lo,tiva bang a luang dingmi kan si,”tiin zumhnak lianpi kan ngeih caah kan i lawmh khunnak a si.

Kum 2011 April 1.
NCMC nih saduh kan thah zungzalmi Ramthar riantuan cu Kum 2011 April thla in kan thok khawh caah Pathian khuakhan a tling cang,tiah Khrihfabu vialte kan tha a nuam i kan lung a tho. Thilyn Baptist Khrihfabu zohkhenhtu ah Rev. Thang Ling le a chungkhar Mindat pengah cun chiah an si. Thawngthabia chimtu paohpaoh a duh bal lomi Pingring khua cu Pathian nih Inn ka a kan on piak caah Salai Shaw Myint Thun Mindat peng UTC a dihmi pa cu umter a si. Thlali hrawng a um hnu ah a Nupi nih Pingring khua um cu ka celh bal lai lo caah kan zul lai lo, a ti i a kir than. Salai Shaw Myint Tun nih a kan kir tak tikah kan hlawh a tling kho lo tiah lungfak mitthli thla in Pathian sin ah thla kan cam.Pathian nih kan caah a thabik in khua a khaan Pastor Van Biak Lian B.Th le a nupi Thian Neih Rem B.Th.Falam,hna cu a kan pek cawlh.Pingring khua ah cun an kal. Pathian nih thluachuah a kan pek i Kum 2012 dih ah cun minung 15, zumtu Thlarau thar a kan pek cang timi thawng kan theih tikah lunglawmhnak in kan khat i Pathian nih sunparnak co ko seh tiah lawmhnak bia kan chim. Thawngthabia a cohlaang bal lomi Pingring khua cu 2012 kum thok cun thawngtha lennak khua ah Pathian nih a thlen cang. Haleluijah Bawipa min thangtha chin ko seh.

Kum 2013-2015 Chung E&M Upa.
Kum le can cu nitin in an liam lengmang,kum 5 chung E&M riantuantu hna zong mi cheu cu thlanmual an liam,mi cheu nih hmun dang ah umhmun an khuar cang, lungthin khat te le lungtho thanuam te i khua rak sak ti lio can tha hna kha tuanbia ah an cang ruangmang ko ai. Kumthum chung E&M riantuantu hna cu thim caan kan hong phan than.

Thimmi hna cu.
1. Pu. Tuan Hmung.Director.
2. Pu. Bawk Thang.
3. Pi. Ester Nu E.
4. Nu.Zing Hnem Sung.
5. Pu.Aung Lin.Church Chairman tuan liomi.
6. JonathanVan Hei Lian.Saya ah hman liomi.

Kan tuan Liomi 
Pingring khua ah zumtu an um cang, timi thawng nih kan lungthin a kan nuamhter i biatak chinchin in tuan duhnak lungthin a kan petu Pathian ka thangthat.Motor Sycle lam kan cawh piak hna tikah zum lotu hna thinlung chungah faakpi in rian a tuan caah an kan dawt. Mission Center sak dingin a herhmi vialte tawlrel dih a si cang. Kum 2013 chungah sak dih dingin timhlamh a si. A ra laimi kum 2014 chungah Biakinn sak piak kho hna u sih timi saduhthahnak lianpi he NCMC ram chungah biatak chuah in E&M upa hna cu Inn kip ah kal in Thlacamnak he thazaang an chuah i an vah lio cuahmah a si.Pathian nih a ngan deuhmi rian a kan fial.Setan pennak ram cu Khrih lennak ram ah a thlen cang. Pingring khuapi tein kumthum chungah Zumtu an si dih khawhnak hnga le nunnak duhdim an co khawhnak hnga,nang le kei tuanvo a kan pek, kan tuan lo ah cun thisen mawh a phurtu ding kan si,tam chinchin in pe hna u sih, tiin thawngthabia aupinak he thazaang thar an laak liopi a si.Khrihfabu vialte zong an thinlungchung ah Biatak Thlarau a phuang i a luan ciami kum le caan i an pekminak let in an pek.Vawleicung khuazakip ah ka tehte nan si lai,” Lamkaltu 1:8. Hi biakam tlin ternak caah chawva a petu hna le Khrihfabu chungtel zapi cungah Pathian thluachuahnak cu vanruahpi bang dong loin sur caamcin ko seh.

Tuan Hmung.
E&M Director (NCMC)
Norway Chin Mission Church (Oslo)
Norway.

Powered by: Wordpress