Uncategorized

Pastor Biak Hlem thawngtha bia (Part1)

Pathian nih an Auh

Biahram domhnak

Khrihfa innchungkhar timi cu Van in a tla i lungkua in a mah duh in a pawt sawhsawhmi a si lo. Na chungkhar cu Pathian nih timhlamhnak ngei tein a dirhmi a si. (Gen. 1:28). Vawleicungah rel cawk lo bu an um. Tch. Khrihfabu, sianginn, sizung, NCCF, mino, etc.

Chungkhar cu thinlung he aa lo. Thinlung hi minung kan nunnak i a hrampi a si bantuk in innchungkhar cu vawlei cung bu vialte  i an hrampi a si. (Gen. 2:7).

Chungkhar cu thinghram he aa lo. Thinghram cu rungrul nih a ei ahcun cu thingkung cu a tto. A ttoh lo hmanh ah a hnah aa dawh lo. A thei ei awk a tha lo. Mibu vialte i a hram a simi innchungkhar cu rungrul nih a ei sual ahcun cu mibu cu ………..

Khrihfa chungkhar timi cu;

  • Minung sernak hmun (Company) a si an ti. Fahrin men khi ti duhmi a si lo. Japan company chuak thilri cu Tuluk company chuak nak in kan tlaihchan deuh tawn. (Hlanlio Kawlramah). Na company in na chuahmi na fale cu sau a nguh i a fekmi, a thlarau Pathian sin phan ding tiang quality ngei tein chuah dingah na chungkhar a sertu Pathian duhmi a si.
  • Sianginn tiah min an sak fawn. Khrihfa nunnak sianginn (the school of Christian living); Nunnak sianginn (the college of life); ngakchia caah cawnnak hmun (the training ground for the child);  le fimnak an i ton dihnak hmun (the centre of education) tiah min an sak hna. Cu sianginn i Khrihfa nunzia dawh le kan nunphung, ca le holh a chimtu saya/ma cu Nu le Pa nan si. (Deut. 6:4-9). Dawtnak ngei lo buin ca a chimmi saya/ma i an siangakchia hna cu zaangfaak tuk an si kha nan hngalh dih.
  • Sizung tiah an ti fawn. Sizung cu a dam lomi nih damnak duhah an panhmi hmun a si. Na fale an ziaza a rawk cangmi, Thlarau lei ah a pial cangmi, Chin nunphung, ca le holh a thlau cangmi (a zawmi) an um sual maw? Damthannak hmun cu na chungkhar kha a si. Dam ter than khotu sibawi cu Nu le Pa nan si.
  • Khrihfabu hmete a timi an um. Khrihfabu cu Thlarau ti le rawl din le ei ah zarhkhat vawikhat kan panhmi hmun a si. Nangmah siseh, na fale si hna seh Thlarau ti a haalmi, Thlarau rawl a taammi nan um sual maw? Na fale Thlarau rawl a khim ter khotu tihaal di a riamh ter kho tupastor cu Nu le Pa nan si. (Matt. 18:6-7).
  • Vawlei cung ram hmete an ti. Kawlram uktu a that lo ruangah rammi kan aihraam i kan tuar. Rammi zawnruat tein uk hna sehlaw a va tha hringhran hnga. Chungkhar ram hmete a uktu cu Nu le Pa nan si. Na ukmi na fale an thlarau an taksa zawnruat bu tein uk dingah na chungkhar a dirhtu Pathian nih an duh piak.
  • An early heaven a ti an um fawn. Vancung pennak cu minunglungthin a umnak hi vawleiah ah aa thok (Luk.17: 20-21). Mipakhat nih ca a tial i Pathian nih innchungkhar hi vancung ah a ser ko nain kanmah nih hell ah kan ser a ti. Chungkhar ah vancung a ser lomi cu hmailei a ca zongah vancung a um hlei ti lo an ti fawn. Chungkhar vanram sertu ding cu Nu le Pa nan si.

 

“Ka nu” “Ka pa” tiah auhmi na si thok in (nu pawchungah naute aa seem thok hmanh khan) “nangmah cu auhmi na si colh.” Abraham, Moses, Peter, Johan, Paul te pawl auh an rak si bantuk khan nangmah cu auhmi na si. Na chungkhar i company tha, saya/ma tha, sibawitha, Pastor tha, uktu tha le vancung ram sertu dingah Pathian nih riannganpi an fialmi na si.

Nang cu Evangelists te hmang in Pathian nih a dawtnak an hngalh ter.

Na fale kha nangmah hmang in Pathian nih a dawtnak hngalh ter dingah “auhmi Missionary” na si kha hawi dawt.

 

pehthan ding

Comments are closed.

Powered by: Wordpress